當紅Van司機遇上綠Van

日前有幸遇上一輛由(我懷疑係)紅van司機駕駛的綠van。我覺得，一部新簇簇，設備齊全的綠Van，係會辜負紅van司機的一手好技術。

紅van司機先生的特點有好幾個，列舉如下：一、轉彎唔減速，刺激程序幾近男友的改裝車。二、直路不斷加速，我由葵芳返青衣，在天穚上有一大段直路，司機行80幾；但新車上總有時速計時器，一過80就係咁響，有型的紅van司機當然唔理，故路上一直響。三、當然係紅van司機的絕技：車未停定就開門，客未落晒車就關門開車，所以他幾乎冇時間係停車的，只有減速。

一手好車技如用在通宵車上，當然會令乘客感激，但如用在短程綠van，乘客基本上唔太趕的話，就只有落得某男乘客落車前冷冷的一句：「以為自己賽緊車咩」，以及我好想好想問出口的：「司機你係咪?開紅van架？」

想知多d紅van司機的技術，可參考:「香港公共小巴司機」 勁過麥拿倫車隊