It means "can't stand it". 頂 ding in Cantonese means "to stand against" - 究竟係「冇得頂」定「定唔順」定「頂唔泡」呢?

Friday, December 16, 2005

示範作

以一個組織活動的角度來看南韓示威者的反世貿易行動,真係無得頂。

日日都可以唔同Gimmick,日日個「相位」都唔同,跳海跳舞打鼓「拜苦路」鬧市集會,仲有當然唔少得的衝擊警方陣線。時間又就得記者,下午三四點,記者們你地遲左少少起身都冇問題架,一定可以影到最好最勁的相。可能銅鑼灣鬧市集會呢個就遲左少少啦,所以蘋果都只係得一幅相。係無線多d鏡頭, 仲可以訪問路人添。尋日衝擊警方, 衝完一次又休息一陣,我覺得真正的原因係俾d記者休息下咋,「今次影唔到,唔緊要,我地一陣間仲有!」 你估佢地第一次停左,有冇記者想叫佢地「 影唔到,可唔可以再黎一次」?

佢地今個世貿週所反映出黎的創意,夠我地公司食成年。可惜好多我地都抄唔到,唔通要跳海咁黎宣傳健康食品,或者衝擊警方陣線咁黎宣傳纖體中心咩。

佢地的示威遊行,引來報紙連日報導,仲引述專家分析,坊間討論,亦令我老媽知道富國對農民的補貼等等政策以及少部份關於世貿係咩黎。作為宣傳活動,真係超標完成。至於佢地係咪真係可以爭取到佢地想要的野,已經係後話。

因世貿會議而來的遊行,發展至而家,已經比會議本身重要。

香港的示威遊行冇人地咁有創意,因為有幾多人參加本身已經係新聞價值的全部。其實佢地的方法先係最有成本效率,如果你鐘意用呢個term,幾千人都可以做到有幾廿萬人的新聞效果。

不過香港的政治活動真係可以參考下, 雖然話政治野大部份報紙都一定到,而且都要有一定程度的正經,不過響每一個活動,其實都應該有d特別的相位俾人影下嘛。次次都係一班一人坐響到, 背後用幾張 A4紙貼個題目出黎,派一大堆數據,講者講野。咁,個報導編幅唔大嘛。

Thursday, December 15, 2005

後現代

一 名 在 現 場 執 勤 「 老 差 骨 」 說 : 「 以 前 越 南 船 民 營 暴 動 , 防 暴 隊 搜 獲 唔 少 自 製 武 器 , 南 韓 示 威 者 唔 算 太 危 險 。 」 他 認 為 , 警 察 與 示 威 者 都 在 扮 演 自 己 的 角 色 , 世 貿 會 議 一 日 未 完 , 還 是 不 會 低 估 對 方 的 實 力 。

摘自《蘋果日報》

Thursday, December 08, 2005

廣州出現換妻遊戲

廣州出現換妻遊戲

在做功課時找到的新聞。近乎是奇談的新聞。在香港這類的新聞會否只在風月版出現?

而且,廣州的記者真係好搏。

Wednesday, December 07, 2005

Rhetorical Pain: 發炮是需要時間滴

認為近來最誇乜張的網戰是這個:
Rhetorical Pain: 發炮是需要時間滴

(八十幾個水蛇春咁長的留言呀大佬)

Monday, December 05, 2005

行街又買野

Ok, 我認自己係爛Gag王。我想講嚴格黎講,我今日冇遊行,因為我一路行一路買野。兩罐汽水一個麥當勞包,最後仲要上理青文買左兩本書。

(途中我冇叫口號冇貼貼紙響身冇拎標語。因為響維園的時候台上叫的口號太搞笑,記得笑唔記得叫。貼紙呢就想完整咁保留佢作為紀念品。免費標語拎響手唔舒服,我又冇自備。)

行行下有人話見到「明哥」,我從佢的眼神中認為佢指黃耀明,就係咁望住佢望的方向。點知,竟然係見到陳方安生。本來見到陳太我都開心,但因為有個錯誤期望下,見到佢竟然有d失落添。點解d人見到佢冇叫口號叫佢參選呢?

其實我參加遊行的方式真係似一個嘉年華會,多個為左爭取咩政治目的而做的事。零三年我跟住牛棚d「音槳樂人」行,仲似。都冇打警察燒車破壞大公報咁。其實去遊行的人都好想要穩定繁榮經濟發展,而如果民主爭取民主係一定要自我犧牲(經濟、自由、人身安全等),我諗大部份人都會,留俾長毛去做。

香港會唔會獨立呢,分裂出祖國呢?嘩,諗下我都覺得好笑。我都好想有CEPA同自由人遊客來港消費架喎。(如果,強調係如果,香港真係獨左立,d解放軍會唔會即刻就入黎解放香港呢?)

我總係無可避免咁對所有事都懷住矛盾而不統一的立場。即係,想點呢。

今次行街最大的收獲,係拎左本名為《綠皮書:香港特別行政區政制改革檢討》的書仔。驚喜位係,返到屋企先知道係由鄭宇碩寫架!!!(同另一個人合寫)

至於今日先買本《俗》,就已經睇完。哎呀,佢陪唔到我去廁所添。

Sunday, December 04, 2005

好得閒的警務人員。

近日曾在不同的網站看見「告全港警務人員書」,並呼籲「請廣傳廣貼,一定要送到真正的警務人員手中」。

唔,到底大家係真係想做d野,做d有效果的野,定係想自我感覺良好呢?

大佬,篇野真係好長好悶喎,連我都冇睇到。可能好多人的心目中的警察都係唔怕悶同好得閒掛?覺得呢篇野真係會影響到佢地的行為啦。